أول ما دخلوا الأوضه قالت إيدي يا ابني هتكسرها إيه حكايتك في إيه
قال بغضب …في إيه مش شايفه في إيه …إيه اللي لابساه ده يا هانم وقدام البنت الصغيره وقدام أبويا ونازله بيه تتمخطري إنت عايز تجننيني عايزه تمشيني من غير عقل
بصتله وقالت .أنا مش فاهمه في إيه ماله اللبس يعني
قال بغضب… ماله.. ده أختك كانت تتكسف تلبسهولي بيني وبينها وإنتي نازله بيه قدام الخدم وقدام الناس
شمس قالت… اااااه قصدك قصير يعني طيب أنا هعمل لك إيه ما أنا قلت لك إن ده لبسي وكله كده والله
سراج قال بغضب … يبقى تترزعي هنا وما تنزليش من هنا لحد ما أبعت أجيب لك هدوم سمعتي
شمس اتنفضت بخوف من صوته وقالت ..والله سمعت إنت بتزعق ليه هو أنا انطرشت
سراج عمل مكالمه للحارس بتاعه وبعته يجيبله هدوم من كل الأنواع علشانها
شمس قعدت بحزن على السرير وقالت.. يا خساره أنا اشتريتهم أنا وجايه على طول دفعت فيهم فلوس كتير قوي أوف على حظي
سراج بصلها بدهشه وقال… كمان.. كمان اشتريتيهم وإنتي وجايه هنا ربنا يهديكي..هي مامتك ما قالتلكش على ظروف الحياه هنا
شمس اتنهدت وقالت..ماما مش بتقول حاجه غير إنها مطلعاكم هنا شياطين.. ما استحملتش تفضل مع بابا واتطلقوا بسبب الحكايه دي بتقول إنه هنا متخلفين وكده يعني
سراج قعد وقال ..مسمهوش تخلف اسمها نخوه ..اسمها إيه
شمس قالت… اوكي ماشي نخوه واتنهدت وقالت بدموع… أهي النخوه دي هي اللي خلتني أنا وأختي ما نشوفش بعض أبداً و غابت من غير ما أودعها
سراج اتنهد بحزن عليها وقال… بس هي كانت بتحبك كانت بتحبك قوي يا شمس حتى لو متقابلتوش
شمس بصتله بدموع وقالت كانت تحبك إنت كمان وبصراحه عندها حق تحبك
سراج اندهش من اللي قالته وبصلها شويه وركز في ملامحها الجميله
شمس تاهت جداً في عيونه وضعفت قوي وقربت منه بلاوعي وقالت بهمس..إنت تتحب..تتحب قوي
سراج اتخدر من همساتها قدام شفايفه وعنيها اللي بتقتلو وشمس باستو من شفايفه برقه شديده
سراج غمض عينيه واستسلم للحظه دي ولجمال قربها شدها عليه بقوه وباسها بوسه قويه جداً وهي حاوطت رقبته بإيديها واندمج سوا في لحظه جميله سرقت أنفاسهم
قطعها صوت تليفونه فبعد عنها و دفعها بقوه ووقف بسرعه وهو بيبصلها بذهول منها ومن نفسه
وقال بغضب وارتباك…لا واضح بتحبيها.. إنتي لو فارقه معاكي أختك كنتي خدتي بالك من الشبه الكبير اللي بينك وبينها وفهمتي إن أي حاجه أنا بعملها ببقى قاصدها هي وبيبقى اشتياق ليها مش أكتر.. كان المفروض إنتي اللي تمنعيني لو ضعفت وقربتلك مش إنتي اللي تبادري ..أنا قلت لك الكلام ده أنا كنت حاسس من أول يوم إن إنتي قاصده تلعبي على الوتر الحساس فاكره إنك كده هتوقعيني في غرامك…انسي أنا بحب شهيرة ومش هحب غيرها وو
بس شمس قاطعته وقالت بغضب شديد وانفعال بس بقى بس يا أخي خلي عندك دم وحس شويه أنا من وقت ما جيت وإنت عمال تهني ..أقولك على حاجه أيوه يا سراج أيوه أنا عايزه أوقعك نفسي تحبني نفسي تحس بيا…نفسي…بقت تبكي جامد وقالت نفسي تحبني زي ما أنا بحبك أو حتى نص حبي ليك
سراج اتسعت عينيه بذهول شديد وقال..حب إيه ونيله إيه هو يوم واحد اللي شوفتيني فيه
بقلم…زهرة الربيع
قالت بدموع… فعلاً هو يوم واحد بس أنا بحبك من قبل كده بكثير ونزلت دموعها بغزاره وقالت مش قادره أقول لك إني بحبك وإنت جوز أختي مش قادره أقولك إني خنتها بتفكيري ١٠٠٠ مرة مش قادره أقول لك قد إيه اتمنيت مكانها كل ما كانت تحكي لي عنك.. صعب عليا أقول حاجه زي كده صعب أحس نفسي غير لائقه للدرجه دي ..بس عمري أقسم بالله عمري ما تمنيت يحصل كده حتى لو كان اللي حصل ده هيجمعنا بس ما اتمنيتش إن شهيرة تحصل لها حاجه وانهارت بالبكا
سراج كان مصدوم جداً بلع ريقه بحزن عليها وقعد جنبها على السرير وقال …احم…اهدي شويه أنا حابب أسمعك إنتي تقصدي إيه بكلامك ده
شمس قالت ببكا… أنا كنت أكلم شهيرة كل يوم شات ومكانش معاها أي حاجه تحكي عنها غيرك ..في الأول كان الموضوع عادي ..بس بعد كده بقيت أنا اللي بستناها تحكي عنك وأسألها عليك كل يوم كنت ببقى مبسوطه جداً لما بتتكلم عنك.. قد إيه راجل بجد وقد إيه بتغير عليها وبتحبها…أنا عمري ما حسيت بالمشاعر دي كنت مفتقده الحاجات دي جداً وعمري ما عرفت راجل زيك هناك كلهم واحد بس إنت كنت غير عشت أتخيل واحد زيك في خيالي أحبك من جوايا وأدعي ربنا يديني واحد زيك بس ..بس وانهارت بالبكا ومكانتش قادره تكمل وقالت بالعافيه …بس أقسم بالله عمري ما اتمني إنها تغيب
سراج كان بيسمعها باهتمام ودهشه وهي قالت…بس هي أخدت بالها أنا ما كنتش فاهمه إنها تعبانه مرة قالت لي لو في راجل زي سراج بالظبط بالملي تتجوزيه وأنا بغبائي قلت لها آه اقبل جداً كمان ..فقالتلي طب هو أنا لو في يوم احتاجتك تخلي بالك على ملاك هتوافقي
و برده بغبائي قلت لها أوافق وفي أي وقت.. بس ليه يعني بتقولي كده ..قالت عادي لو اضطريت أروح مشوار هطول فيه تقبلي تكوني معاها
.. أنا وقتها افتكرت إنكم ممكن تسافروا ومكنتش فاهمه إنها بتغيب
سراج نزلت دموعه وقال..أنا كمان قالتلي تقبل تتجوز واحده غيري ..يعني لو كانت شبهي بالملي هتفرق معاك بس أنا كنت عارف إنها تعبانه وكنت فاهم إنها تقصدك
شمس قالت بدموع أنا آسفه على اللي حصل من شويه سامحني حاول تسامحني وأنا همشي من الأوضه دي أصلاً أنا عارفه إني بجرحك قوي بوجودي وبتصرفاتي أنا آسفه مش هعمل كده تاني ممكن أكون أنا بحبك بس أنا عارفه إن إنت مش بتحب غير شهيرة… عن إذنك
شمس لسه هتمشي مسك إيدها وقال أنا فعلاً مش بحب غيرها في الوقت الحالي وبحس بالذنب قوي بحس إني بخونها لما بتحصل أي حاجه بيني وبينك بس ..بس ممكن أحاول علشانك يا شمس
شمس بصتله بذهول وهو قال… أيوه أحاول علشانك علشان إنتي تستاهلي المحب.. إنتي مغلطتيش في حاجه مش ذنبك إن قلبك اتمنى حد معين مش ذنبك إن العيشه اللي عشتيها في أوروبا وفي البلاد دي تخليكي تتمني راجل شرقي من هنا ده شيء طبيعي جداً وأنا مقدر مشاعرك…واتنهد وقال بالم.. أنا أصلاً محتاج للمشاعر دي محتاج أرجع أعيش من تاني
شمس بصتلو بسعاده و بذهول وحضنته بقوه وقالت أنا مبسوطه قوي مش هتندم والله أنا ممكن أعمل أي حاجه علشانك
سراج ابتسم على فرحتها ..ورفع إيده بتردد وحضنها بالراحه بس أول ما حس بيها بين إيديه شدد من حضنه ليها وضمها لقلبه جامد واتنهد وقال…هنحاول سوا أوعدك هحاول أنا عايزك معايا محتاجلك أوي
