مشفتوش كان راكب عربيته منزلش منها
عيني لمعت وخفت ما أنا اتعقدت من سيرة العربيات
_العربية لونها أيه
_أبيض
هنا ارتحت وأعصابي ارتخت وأخدت منه الورد وقفلت الباب
بصيت على الورد باستعراب مش عارفة منين الورد ده فلقيت كارت مكتوب عليه
_هتكوني أحلى وردة في بستان حياتي
ساعتها عرفت مين اللي بعت الورد ده
_ده الشاب اللي عرض انه يتجوزني امبارح ..صدقوا نسيت أسأل عن اسمه.
.فطلعت الكارت اللي من وقتها وهو فى جيبي قرأت الأسم …سمير زاهر عبد العزيز.
_مم بقى اسمك سمير وعاملي فيها رومانسي وباعتلي ورد يا خويا كنت جبت ربع كيلو لحمة بتمنهم .
_مين اللي كان بيخبط يا أمينة ومالك بتكلمي نفسك ليه
شافت الورد في ايدي
_الورد ده منين ..غريبة اوي
_لا ده عم فتحي البواب بيقول ان واحد بعته ليا يا ست عفاف .
_واحد بعته ليكي انتي واحد مين ده با أمينة وتعرفيه منين قوليلي متخبيش عليا أنا زي والدتك
_والله معرفوش ده شاب عجيب كدا جالي امبارح وعرض عليا الجواز والنهاردة لقيته باعت ورد
_ده الموضوع كبير بقا .. ليه مجبتليش سيرة
_أنا مأخدتش الموضوع جد يا ست عفاف ايه اللي يخلي واحد ببدلة تسوى شىء وشويات زيه يبص لواحدة فقيرة وكحيانه ومعدومة ومحكرته وملهاش منظر زيي
_ايه يا أمينة خدي نفسك يابنتي .. متقوليش على نفسك كدا .. انتي ست البنات كلهم… الفقر مش عيب يابنتي ولا بإيدينا
_الحمد لله يا ست عفاف أنا راضية …أنا بس بقولك اني شايفة الفرق الاجتماعي ما بينا علشان كدا مهتمتش علشان معشمش نفسي على الفاضي.
_طب الشاب ده شافك فين ولا عرفك منين
_مش عارفة وانا مسألتش يا ست عفاف …أكيد في السوق ما انا مش بروح مكان غيره
_يمكن .
روحت بعدها حطيت الورد في مزهرية على الترابيزة
_انتي بتعملي ايه …هتسيبي الورد هنا ليه مش ده جايلك .
_هعمل بيه إيه عندي ملوش مكان … خليه هنا عامل منظر جميل للبيت .
_ربنا يابنتي يجعل بختك وحظك من الدنيا واسع .
__
بالليل لقيت ست عفاف طلعتلي
_أمينة .. خدي البسي الفستان ده وتعالي تحت عايزاكي
_فستان ايه ده وليه … انتوا رايحين مناسبة وعازمني معاكم ولا ايه!!
_بطلي غلبة البسيه يلا من سكات وحصليني على تحت
_ لا صحيح يا ست عفاف أنا هلبس فستان زي ده ليه
_وبعدين معاكي يا أمينة .. يلا ادخلي البسيه ..الحجاب بتاعه معاه ..ها
_طيب حاضر
دخلت لبسته وأنا مش عارفة أنا ليه بلبسه ..عجبني شكلي فيه أوي وفضلت ادور حوالين نفسي بإعجاب …
__
_ها يا ست عفاف وافقت تلبسه ؟
_ايوة هتلبسه ونازلة وطبعا متعرفش حاجة أنا مقلتهاش زي ما طلبت .
_اه أنا حابب أعملها ليها مفآجئة.. وزي ما قلتك يا حج رؤوف أنا هحط أمينة في عنيا …أمينة أنا من أول ما شفتها وانا حبيتها ومش قادر أخرجها من دماغي .
حج رؤوف رد وقال
_اوعدني يا بني انك تحافظ عليها .. دي بنت طيبة ومكسورة الجناح وملهاش حد في الدنيا ..غيرنا
سمير قال بمكر مداريه
_أيوة طبعا يا حج أمينة مش بس هتكون مراتي دي هتكون زي بنتي اللي بخاف عليها من الهوا الطاير متقلقش
ست عفاف قالت وهيه فرحانة ومبسوطة
_ربنا يباركلك يابني … انت لو تعرف الفرحة اللي فى قلبي قد إيه لأمينة… أخيرا الدنيا هتضحكلها وهتشوف العوض عن حياتها الصعبة اللي عاشتها
_ربنا يسعدك ياست عفاف …أمينة هتيجي معايا الفيلا تعيش مع والدتي… وزي ما قلتلكم ماما ست مريضة وليها ظروفها بتتحرك بكرسي متحرك…علشان كدا مقدرتش أجيبها معايا .. ووالدي متوفي .
_الله يرحمه ويخليلك الست الوالدة ويشفيها بإذن الله
_متخافش عليها أمينة هتهتم بيها وهتحطها في عنيها من غير حتى انت ما تطلب .. أمينة بنت جدعة وبنت حلال ودايما قلبها على الكل بتساعد الكبير قبل الصغير
ابتسم ابتسامة صغيرة وقال
_ماهو علشان كدا أنا صممت على أمينة بالذات
_ربنا يسعدكم يابني .
_المأذون والشهود زمانهم في الطريق دلوقتي علشان نكتب الكتاب
الحج رؤوف وست عفاف بصوا لبعض بفرحة وقالوا
_على خيرة الله .
في الوقت ده أنا كنت نزلت وجيت أخبط لقيت الباب موارب فخبطت خبطة بسيطة ودخلت لقيت البيت كله ورد ..وريحة برفان رجالي جميلة أوي مالية المكان
بعدها سمعت أصوات حد بيتكلم فبصيت على مصدر الصوت لقيت الحج رؤؤف والست عفاف قاعدين ومعاهم واحد مقدرتش اتعرف عليه .
الست عفاف اول ما شافتني قامت وجت ناحيتي ومسكت ايدي
_تعالي يا أمينة … ألف مبروك ياحبيبتي.
بصتلها وانا مش فاهمة حاجة
وأول ما شفته استغربت…لكني بدأت أفهم إيه اللي بيحصل .
الحج رؤؤف قال
_تعالي يا أمينة سلمي على عريسك يا بنتي
_عريسي
سمير قام وقف وغمزي علشان أفهم انه جاي حسب اتفاقنا
_إزيك يا أمينة… عاملة ايه!
