الله يسلمك يا بنتي .. لا خليهم ليكي ..
_كتر خيرك والله يا حج خيركم مغرقني
_زي بعضه خليهم معاكي دول حاجة بسيطة
_الله يصلح حالك ويشفيك ويقويك ومن الكوثر يسقيك ومن ثمار الجنة يهنيك قادر يا كريم
_ايه يا أمينة وانا مليش نصيب من الدعوات الجميلة دي
_لا ازاي ده انتي الخير والبركة .. ربي يرضى عنك ويراضيكي وجوار النبي محمد يؤويك.
خلصت تنظيف الشقة كلها وغسلت الغيارات اللي محتاجة غسيل وحضرت الغدا وبعدها طلعت على عشتي ارتاح .
يا دوب كنت لسه هفرد ضهري لقيت الباب بيخبط
فقلت وانا متضايقة أكيد ابن حد من الجيران بيعلب او بيهزر هزار سخيف زي عوايده
فقلت وانا بصرخ فيه
_ انت يا واد انت وهو أجروا العبوا بعيد لما أريح شوية ..
لما لقيت الخبط مستمر زعقت أكتر
_ انتوا عارفين لو مسكتوش هقوم أدلق فوقكم جردل الماية وانتوا أحرار .
استمر الخبط على الباب فمسكت جردل المية وقمت وانا متغاظة علشان ادلقه فوقيهم ما هما مش بيحرموا أبدا كل مرة في نفس المعاد بعد المدرسة لازم يطلعوا يرزلوا عليا
فتحت الباب وكنت لسه هدلق الماية من غير ما أشوف مين لقيت إيد مسكت إيدي والأيد التانية مسكت الجردل قبل ما يندلق فوقيه ..
_حاسبي يا مجنونة
رفعت وشي وبصيتله بصدمة فلقيت !!
_انت مين يا حضرة وعايز ايه.. وعرفت بيتي منين … وبتعمل ايه هنا .
نزل الطبق وقال
_ايه افصلي ..خدي نفسك شوية انتي ايه ..لوكلوك لوكلوك .
_انت مين يا جدع انت وجاي هنا ليه.
_يا بكابورت انتي افصلي
_اللهم طولك ياروح … انطق انت مين وجايلي هنا ليه والا هقفل الباب في وشك
_انت مسمية حتة الصفيح دي باب
_يارب الصبر من عندك
وجيت أقفل لقيته حط رجله منع إني أقفل الباب وقال
_اتعلمي الصبر يا مصيبة انتي واتنيلي اقعدي علشان تسمعي أنا جاي أقولك ايه !
_ها عايز مني ايه
_لا اتكلمي كويس معايا
_انت جاي تهرج حضرتك .. اوعى تكون مفكرني علشان قاعدة لوحدي يبقى هسيب كل مش هب ودب انه يتكلم معايا
_كل من هب ودب! .. لا إنتي بجد مش شايفة منظرك عامل إزاي
_ماله شكلي يا ادلعدي .. ها ..انت جاي تغلط فيا ولا إيه
_استغفر الله العظيم ..يارب الصبر من عندك …هتسمعي هقولك ايه ولا أخد بعضي وأمشي
_ياريت وتكون ريحتني.. يلا لم اللي اتبعتر منك وامشي .
لا انتي عايزة كسر دماغك بجد
_يوووه ما تتنيل تنطق تقول جاي ليه
_العربية السودا اللي بتمشي وراكي.
هنا انا برقت وفتحت بؤقي وقلت بخوف
_ءء انت تعرف العربية دي!
_أنا جاي هنا مخصوص علشان أحذرك منها…العربية دي فعلا مستقصداكي .
_وانت عرفت منين
_هقولك …بس شوفيلي مكان نضيف أقعد فيه
_أهو قعدت اتكلم ..أنا سامعاك .
_صاحب العربية السودا بيلاحقك بقاله فترة صح ولا انا غلطان
_أيوة صح …ليه بيعملوا كدا عايزين مني ايه
_الراجل ده عضو في عصابة لتجارة الاعضاء
صرخت فكتم بوقي
_يلهوي
_اسكتي هتلمي الناس علينا
_اسكت ايه انت بتقول تجارة يعني بيلاحقوني علشان يسرقوا أعضائي ويبيعوها
_بالظبط… أعضاءك واطرافك كلها
_يالهوي انت بتقول ايه يا أستاذ انت
_بقول الحقيقة
_ايه ..ططط.. طب انت عرفت منين
_للأسف اعرف صاحب العربية السودا وهو فرد من أفراد العصابة وسمعته بالصدفة بيتكلم عنك وانه هيراقبك علشان يشوف اللحظة اللي هيخطفك فيها ويوديكي للمنظمة .
بلعت ريقي
_أنا …يا ميلة بختي ياني … طب هعمل ايه .. أنا أنا مش هخرج من باب أوضتي تاني … أموت بكرامتي وعلى فرشتى بدل ما أموت متقطعة وكل عضو ليا في ناحية .
_اطمني أنا هنا النهاردة علشان أمنع ده
_ايوة الله يكرمك يا أستاذ .. انت هتبلغ عنه مش كدا
_فكرت ف الموضوع ده بس للاسف مفيش دليل على ده لازم أمسكه متلبس
_طب الحل ايه دلوقتي أهرب.. أهج من البلد ولا أعمل ايه
_بقولك بيراقبك يعني هيجيبك مكان ما تروحي
_ يالهوي ياني… كنتي صغيرة ولسه في عز شبابك يا أمينة
_أسمك أمينة عاشت الأسامي
_تعيش يا خويا .. بس عاشت ايه انت بتقول هتقطع ومش هيبانلي أصحاب
_قلتلك أنا هنا علشان أمنع ده
_طب ما تنطق بدل ما انت سيبت مفاصلي كدا وخلاص هموت منك… ولا استنى كدا أنا موت فعلا ..عااا
ضحك وقال
_انتي مصيبة فعلا
زعقت وقلت بعد ما فقدت أخر ذرة صبر عندي .
_اتكلم بقا الله لا يسيئك
_اسمعي انتي علشان ميقدرش يوصلك لازم تيجي معايا
_أجي معاك فين ..
_انا الوحيد اللي هقدر أحميكي منه وهوديكي في مكان عمره ما يقدر يطولك او يوصلك
_ايوة بس أنا معرفكش ومشفتكش قبل كدا مش يمكن انت نصاب وبتضحك عليا
_خلاص انتي حرة بس مترجعيش تندمي لما تتقطعي حتت وكل جزء في مكان .
_يالهوي لااااا .
اسمعي علشان أكون صريح معاكي وتدينى الأمان
_ايوة هتعمل ايه
_هتجوزك
_نعم!!
أمينة وسر السيارة السودا
بارت٢
بصيتله وتنحت
_نعم .. تتجوز مين
_اتجوزك انتي يا أمينة ..مالك مستغربة ليه .
_اللي هو إزاي ده انت تعرفنى من إمتى ولا أنا أعرف عنك إيه
_يا بنتي بقولك هعمل كدا علشان أحميكي
_وبعدين
_ولا حاجة لما يزول الخطر تقدري ترجعي لحياتك الطبيعية عادي
_طب أنا أصدقك ازاي
قام وقف وقال
_ده الكارت بتاعي فيه كل بياناتي…تقدري تسألي عني بنفسك…فكري واحسبيها صح … بس ياريت بسرعة قبل ما تلاقي نفسك
شهقت بسرعة بخوف
_لا متكملش…تف من بوءك… بعيد الشر عليا اللهم أحفظني.
__
قالها ومشي وأنا فضلت واقفة مكاني وماسكة الكارت ومبلمة
مبقتش عارفة أعمل ايه ولا أفكر ازاي … بس كل اللي متأكدة منه إني هسيبها على الله واللي مكتوبلي هشوفه
دخلت على عشتي تاني واستخبيت في سريري وروحت في النوم وكأني بهرب من الحقيقة اللي سمعتها بالنوم
مصحتش الا لما الست عفاف طلعتلي وقالت وهي بتخبط
_أمينة انتي كويسة يابنتي
فتحتلها الباب وقلت
_اتفضلي يا ست عفاف أه أنا كويسة ..خير الحج رؤوف تعب تاني!!
_لا الحج رؤؤف كويس
_الحمد لله
_انتي فينك كل ده مش ظاهرة من الظهر
_ايه ده هو الساعة كام
_الساعة ٨ بالليل …ولما مشفتكيش بقية اليوم قلقت عليكي
_انا والله محستش بنفسي خالص.. حاضر هنزل حالا أحضرلكم العشا
_لا احنا اتعشينا من بدري
_حقك عليا والله انا مش عارفة ازاي النوم غلبني كدا
_انتي فعلا بتتعبي يابنتي ربنا يعينك
رجعت الست عفاف على شقتها
وانا صليت الصلوات اللي فاتتني ومعرفش ازاي جبت النوم العميق ده رغم انه المفروض كان النوم طار من عيني بعد اللي سمعته
بعدها حاولت أشغل نفسي وأكمل مفرش الكروشيه اللي بعمله مقدرتش ..سرحت كتير..وايدي ارتجفت كتير فعملت أخطاء كتير خلتني كل شوية أعيد من الاول علشان كدا قررت أسيب الكروشيه النهاردة… ورجعت أصلي قيام الليل وأدعي ربنا انه يحفظني .
تاني يوم الصبح نزلت اعمل الفطار وأروق الشقة زي كل يوم فسمعت جرس الباب
_مين ياللي على الباب… ايه ده الورد ده من مين
_معرفش… الورد ده جايلك واحد قالي اوصله ليكي
_والواحد ده مش عارف هو مين
_لا والله مش عارف
_طب مواصفاته ايه
