كل اللي بتقوليه ده بيدل على إن فيه ثغرات كتيرة في القضية، خصوصًا موضوع تحويلات الملايين وعقد البيت اللي اتغيرت ملكيته من غير علمك… اتقابلي بكره الصبح في مكتبي، وهاتي معاكي أي أوراق قديمة أو مستندات خبيتيها.
قلت بلهفة
تمام يا فندم، هكون عندك.
تاني يوم الصبح بدري، استأذنت الحاجة فاطمة، وركبت المواصلات لحد مكتب الأستاذ حسام في وسط البلد.
المكتب كان شكله قديم بس منظم جدًا، مليان ملفات ودواليب حديد.
الأستاذ حسام كان راجل في أواخر الأربعينات، بملامح حادة وعينين ذكيتين بتلاحظ كل تفصيلة.
قعدت قدامه، وطلعت من شنطتي
شنطة صغيرة فيها المستندات القديمة صور عقود، كشوفات حسابات قديمة للشركة، وإيصالات كنت مخبياها عند واحدة صاحبتي قبل ما أتقبض عليّا.
مسك الورق، وبدأ يقلب فيه واحدة واحدة بعدسة مكبرة أحياناً، وبتركيز شديد.
عدت ساعة كاملة من الصمت التام في المكتب، ماكنش بيطلع منه غير صوت تقليب الورق.
فجأة، رفع راسه وبصلي وقال
داليا أختك وجوزك كريم مش محترفين في التزوير… دول سابوا وراهم أثر واضح جداً.
قلت بقلب بيدق بسرعة
قصدك إيه؟
شاور ب القلم على ورقة تحويل بنكي
التحويلات اللي تمت بملايين الجنيهات… حصلت في الفترة اللي كنتِ فيها مع حماتك في المستشفى… صح؟
هزيت رأسي بسرعة
أيوه، بالظبط.
كمل كلامه وهو بيبتسم ببرود
الورق ده بيقول إن التوقيع اللي اتعمل على التحويل مش توقيعك… ده متقلد بطريقة رديئة، ولو اتعرض على خبير خطوط استشاري، هيبان في ثوانٍ إن خط إيدك مختلف تماماً… والأهم من كده؟
سكت ثواني وكمل
فيه توكيل عام رسمي كريم كان عامله لنفسه، وكان ملغي قبل التحويلات دي بأسبوعين… يعني أي بيع أو نقل ملكية للفيلا أو الشركة في الفترة دي يعتبر باطل بطلان تام.
حسيت إن روحي رجعتلي. دمعة نزلت غصب عني، بس المرة دي كانت دمعة راحة مش وجع.
قلت بصوت مهزوز
يعني… يعني ممكن أجيب حقي؟
وقف الأستاذ حسام، وشد جاكيت البدلة وقال
مش بس هتعودي حقك… دول هما اللي هيقعدوا في المكان اللي أنتِ خرجتي منه.
…
رجعت بيت التجمع وانا حاسة إن فيه قوة جديدة
جوه قلبي.
الحاجة فاطمة كانت قاعدة في الصالون بتشرب شاي، وأول ما دخلت، بصتلي وقالت بابتسامة دافية
شكلك كده سمعتِ أخبار حلوة.
قعدت قدامها وحكيتلها كل اللي قاله الأستاذ حسام.
هزت راسها برضا وقالت
كنت متأكدة… حسام ما بيغلطش.
بس الهدوء ده ما قعدش كتير.
بالليل، وصلني تليفون من رقم غريب.
فتحت الخط، وسمعنا صوت داليا وهي بتصرخ بصوت مسطول أو مرعوب
يا ياسمين… تعالي حالا على بيت بابا القديم… كريم هرب… والشرطة هنا!
سكت شوية، وقلت بصوت هادي وثابت لأول مرة من سنين
الموضوع خلص يا داليا… استني مني المفاجأة بكرة الصبح.
وقفلت السكة في وشها.
متوفره على روايات واقتباسات
تاني يوم، ومع أول ضوء شمس، مكنتش رايحة لوحدي.
كنت مع الأستاذ حسام ومعايا قوة من مباحث الأموال العامة، بالإضافة لتقرير مفصل مثبت فيه بالدليل القاطع تزوير عقود الشركة والفيلا، وبطلان التوكيلات، وتلاعب الحسابات البنكية اللي عملوها أثناء فترة وجودي في المستشفى.
لما وصلنا بيت بابا القديم، كانت الدوشة مالية المكان.
داليا كانت واقفة قدام الباب بتهستر، وشعرها منكوش، ووشها أصفر من الخوف.
أول ما شافتني جاية ومعايا الشرطة، جريت نحتي وعايزة تصرخ، بس وقفت مكانها لما شافت نظرة عينيا.
في اللحظة دي، افتكرت كل دمعة نزلت مني جوه جدران الحجز الباردة، وكل ليلة نمت فيها وأنا مقهورة وبريئة،
وكل كلمة إهانة رمتها في وشي وهي لابسة دهب أبويا.
تقدم الأستاذ حسام بكل هيبة، وطلع الورق الرسمي، وقال للظابط بصوت عالي وواضح
كل عقود البيع والتنازل دي
مزورة، وفي أمر ضبط وإحضار لداليا وكريم بتهمة النصب والاحتيال وغسيل الأموال والاستيلاء على أموال الغير بطرق غير مشروعة.
داليا انهارت تماماً وقعدت على الأرض بتعيط بصوت عالي
يا ياسمين! سيبينا يا ياسمين! إحنا أخوات!
بصيت لها ونزلت لمستواها، وقولت بصوت هادئ جداً
لما كنتِ بتمضي اسمي على ورق الحجز… مكنتيش تعرفي إن للأخوة ثمن؟ قطر الندى اللي زرعتيه، أهو جه وقت حصاده يا داليا.
الشرطة كتفت داليا وركبوها عربية البوكس، وفي نفس الوقت كانت الاتصالات شغالين على القبض على كريم اللي هرب لأسكندرية واتمسك في كمين على الطريق الصحراوي.
الشركة رجعت لاسمي، والفيلا بتاعتي في الشيخ زايد رجعتلي بحكم قضائي نهائي، وكل قرش اتسرق مني رجع بفوائده القانونية.
…
بعد مرور شهرين كاملين…
كنت واقفة في جنينة بيت الحاجة فاطمة، بشرب الشاي الصباحي، والهواء البارد بيلاعب شعري.
الحاجة فاطمة قربت مني، وحطت إيدها على كتفي بحنان وقالتي
الواحد لما بينظف قلبه من الحقد، ربنا بيرزقه باللي يعوضه أضعاف.
بصيت لها وابتسمت من قلبي، ولأول مرة من سنين طويلة…
حسيت إني بقيت أنا… ياسمين الحقيقية.
مش المحتجزة… ولا المكسورة…
لكن
الست اللي قدرت تبني نفسها من جديد، وتجيب حقها تالت ومتلت
تمت
